भक्तपुरका घरेलु तथा साना उद्योगी व्यवसायीहरुको मौलिक एवं परम्परागत उत्पादनको बजार प्रवद्र्धन गर्ने उद्देश्यले कोसेली घर सञ्चालनमा ल्याइएको छ ।
भक्तपुर घरेलु तथा साना उद्योग संघले सञ्चालनमा ल्याएको उक्त कोसेली घरको मंगलबार एक कार्यक्रमबीच प्रदेश ३ का उद्योग, पर्यटन, वन तथा वातावरणमन्त्री अरुण नेपालले उद्घाटन गरेका छन् ।
भक्तपुर नगरपालिका ९ तचपालस्थित विश्वसम्पदा दत्तात्रय मन्दिर परिसरमा सञ्चालनमा ल्याइएको कोसेली घरको रिबन काट्दै प्रदेशमन्त्री नेपालले पर्यटन उद्योगबाट सर्वसाधारण लाभान्वित हुनुपर्ने बताए ।
‘पर्यटन वर्ष सन् २०२० मा नेपाल भित्रिने २० लाख पर्यटकले गर्ने खर्च सर्वसाधारण जनतासम्म पुग्नुपर्छ’, उनले भने, ‘हामीले ठूल्ठूला उद्योग खोल्छौं भनेर सोच्न हुन्न । घरेलु तथा साना उद्योगमै जोड दिनुपर्छ ।’
प्रदेश नम्बर ३ का सांसद प्रतिमा श्रेष्ठले खुम्चिँदै आएको घरेलु तथा साना उद्योगका उत्पादनको बजारलाई विस्तार गर्न कोसेली घर सहयोगी हुने बताइन् । उनले घरेलु तथा साना उद्योगी व्यवसायीहरुको प्रतिस्पर्धी क्षमतासमेत बढाउनुपर्नेमा जोड दिइन् । नेपाल घरेलु तथा साना उद्योग महासंघका अध्यक्ष श्याम गिरीले नेपालका घरेलु तथा साना उद्योगका मौलिक उत्पादनको अनलाइन बिक्री वितरणको व्यवस्था गर्न महासंघले देशव्यापी तालिम सञ्चालन गर्न लागिएको जानकारी दिए । घरमै बसेर बजारीकरण गर्न सकिने अवस्था आएकोले सामाजिक सञ्जाल एवं सूचना तथा सञ्चार प्रविधिलाई उत्पादनमुखी बनाउन महासंघ लागिपरेको उनको भनाइ थियो ।
कार्यक्रममा भक्तपुर घरेलु कार्यालयका प्रमुख सुवोधकुमार शाह, भक्तपुर घरेलु तथा साना उद्योग संघका अध्यक्ष वीरेन्द्र जती, सचिव प्रेम खर्बुजा, पूर्वअध्यक्ष चन्दनकृृष्ण श्रेष्ठलगायतले भक्तपुरका मौलिक एवं परम्परागत घरेलु उत्पादनको एकीकृत बजार प्रवद्र्धन गर्न कोसेली घर सघाउ पुग्ने विश्वास व्यक्त गरे । कोसेली सञ्चालनमा आएसँगै यहाँका घरेलु तथा साना उद्योगी व्यवसायीहरु उत्साहित भएका छन् ।
कोसेली घरमा भक्तपुरको परिचय बनेका एवं मौलिक उत्पादन काष्ठकला, नेपाली कागजका हस्तकला, नेवारी घरबुना कपडाका पुतली, खेलौना, हाकुपटासी, भादगाउँले कालो टोपी, टाइचिन चिउरा बिक्री वितरणका लागि राखिएका छन् । त्यस्तै धातु तथा ढलौटका कलाकृति, चित्रकला, भोजपुरे खुकुरी, मुकुन्डो, माटोबाट बनेका क्युरियो सामग्रीसमेत कोसेलीघरमा राखिएका छन् । कोसेली घरमा यहाँका मौलिक एवं परम्परागतसँगै ६० थरि स्थानीय उत्पादन राखिएको संघका अध्यक्ष जतीले जानकारी दिए । संघका अनुसार कोसेली घर सञ्चालन गर्न प्रदेश नम्बर ३ सरकारअन्तर्गतको पर्यटन विकास आयोजनाबाट १९ लाख रुपैयाँ आर्थिक अनुदान प्राप्त भएको थियो । त्यस्तै संघको तर्फबाट थप १२ लाख रुपैयाँ खर्च गरिएको छ ।
